Formannskapet i Lærdal handsama framlegg til investeringsprogram for fylkesvegnettet i møte 17. mars 2022. Dei vedtok her å spele inn enno ei gong at ny Øye bru og ny gang- og sykkelveg på fylkesvegen Skulevegen - Ofta er 1. prioritet for naudsynte prioriteringar for investeringar på fylkesvegane i kommunen. Denne strekninga ligg i dag inne i investeringsprogrammet i såkalle "kanskje"-post, og det er viktig for kommunen å få fram at dette er eit prosjekt som no har venta i mange år, og treng å bli prioritert i næraste tidsperiode. Les heile sakspapiret frå formannskapet her.
Kommunen har tidlegare i planprosessen spelt inn fleire viktige investeringsbehov på fylkesvegane i Lærdal, og desse vil det og bli arbeida for å få prioritert i neste runde. To oppgraderte bruer på Øvre Kvamme i Borgund ligg allereie inne i investeringsprogrammet.
Alle kan levera innspel til investeringsprogrammet for fylkesvegane, også privatpersonar, bedrifter, lag og organisasjonar. Når investeringsprogrammet for fylkesvegane i heile Vestland skal vedtakast, kan lokalt engasjement verte avgjerande for kva saker som vert prioritert.
Les meir om Regional Transportplan for Vestland og investeringsprogrammet her.
Har du innspel til investeringar på fylkesvegar i Lærdal?
Vestland fylkeskommune har laga eit utkast til investeringsprogram for fylkesvegnettet, som seier noko om kva investeringar som skal prioriterast i fylket vårt dei neste åra. Dette ligg no ute til høyring, og alle kan innan 01. april 2022 gje innspel til prioriteringane.