Torsdag gjekk det første av tre show denne helga av stabelen, der ei rekkje samarbeidspartnarar var inviterte – blant anna mange lokale verksemder.
Dagleg leiar Even Aarethun heldt tale der han fortalde om historia, dei ulike satsingane Lærdal ferie- og fritidspark har hatt opp gjennom – han snakka varmt om dei mange både lokale og internasjonale samarbeidspartnarane og tok tilsette opp på scena.
Så tok kona, Elena, ordet – og minna Aarethun på at det var hans eiga satsings- og stå på-vilje som hadde skapt det verksemda er i dag.
Ordførar Audun Mo gratulerte med jubileet frå Lærdal kommune i form av ei blomehelsing – Lærdal ferie- og fritidspark har også gitt mange viktige tilbod for lokale i Lærdal; alt frå motorikkparken til restauranten Strandsitjaren og utleige av tråbilar og syklar.
Attpåtil framførte Boney M-coverbandet ein eigen song for ferie- og fritidsparken der publikum vart oppmoda til å vera med i form av ein enkel ståande dans – noko som fall seg meir naturleg for somme enn andre.
Lærdal kommune ønskjer Lærdal ferie- og fritidspark lukke til med jubileumsfeiringa vidare denne helga!